आभाळ नेसूनि ये..

विझला सूर्य, निजली संध्या
तू चंद्राला जागवीत ये
चांदण्यांची फुले माळूनी
रात्र सारी फुलवित ये

काळोखाचे काजळ अन्
लाली त्या संध्येची घे 
गर्द घनांची शाल ओढुनी 
आभाळ सारे नेसूनि ये

नक्षत्रांचा हार गळा 
बांधून पैंजण लाटांचे
वाऱ्यावरती स्वार होऊनि 
अलगद अवनीवरती ये

गात तराणे मुग्ध नदीचे 
क्षितिजावरती नाचत ये
पाऊलखुणा शोधीत माझ्या
हासत ये, लाजत ये

ये प्राणांची ज्योत होऊनि 
वेड्या मनाची प्रीत होऊनि 
स्वप्न साजिरे तुटण्याआधी 
ये जराशी मिठीत ये.. 


- दीपक परुळेकर 

प्रिय मैत्रिणीस..... (२)

मैत्रिणी,
खरं तर तुला सांगायचीय गोष्ट एका राजकन्येची,
एका शापित राजकन्येची.
मनापासून आवडत असलेल्या व्यक्तिवर
प्रेम न करण्याचा शाप होता तिला.
म्हणूनच ज्याच्यावर होतं तिचं खरंखुरं प्रेम
त्या प्रियकराचा तिने केला होता खून.
आजही ऐकू येते कधी त्या किनार्‍यावर
त्याच्या बासरीची संदिग्ध धून... 

मैत्रिणी, 
प्राजक्ती दवांत भिजलेली स्वप्ने
विखुरलेली असतात उशीवर.
मला वेचून करायची आहे
त्यांची एक सलग स्वप्नमाळ,
आणि वाहायचीय त्या शापित राजकन्येच्या
प्रियकराच्या आत्म्याला.
भास नाही, खरं सांगतो
मलाही ऐकू येतात कधी कधी
त्या बासरीचे संदिग्ध सूर.
त्या राजकन्येचाही तेव्हा
फुटला असेल का गं ऊर..         

मैत्रिणी,
काल पाहिलं मी एक जहाज
किनार्‍यापासुन दूर जाताना.
उरांत भरुन तो उन्मत्त वारा,
पण ते लपवू शकलं नाही
मंदावलेला वेग आणि डोळ्यांतल्या धारा..

मैत्रिणी,
मी पाठवणार आहे त्या शापित राजकन्येला
एक सलाम.
कारण, प्रत्येक सुरु केलेल्या गोष्टीला
द्यावा लागतोच ना गं पुर्णविराम....

प्रिय मैत्रिणीस...

मैत्रिणी, 
संधिप्रकाशाच्या रंगांच कोडं मला अजुन उमगलेलं नाही.
निर्जन किनार्‍यावर बसुन मी त्या रंगांची उधळण बघत राहतो निश्चलपणे..
अगदी त्या रंगांना काळोखाने गिळेपर्यन्त..
तू आज इथे हवी होतीस..
मग आपण शोधले असते त्या संधिप्रकाशाच्या रंगांचे रहस्य..
आणि तुझ्या डोळ्यांतून वाहणार्‍या नदीचा उगम..

मैत्रिणी,
इथे सारं काही बदलून गेलयं.
वैराण वाळवंटासारखा भासू लागलाय आपला किनारा..
परक्याने हाक मारावी तसा स्पर्शुन जातो हा वारा..
तुझ्या पाउलखुणा शोधत माझी नजर फिरत राहते
पण प्रत्येक सापडलेल्या खुणेला ती बेभान लाट पुसून जाते..

मैत्रिणी,
इथे फक्त माजलयं स्वार्थी माणसांचं रान,
माझ्या वहीत मी अजुनही जपून ठेवलयं
तू दिलेलं ते पिंपळाचं पान.
कधी कधी मी ती वही उघडतो,
प्रत्येक पानावर हात फिरवत राह्तो.
तुझ्यासाठी लिहिलेल्या प्रत्येक शब्दाला डोळ्यांत भरुन घेतो,
प्रत्येक शब्दाला शहारत, स्पर्शत मी त्या पिंपळपानापर्यंत येतो.
तिथून पुढे मी काहीच लिहिलेलं नाही....

मैत्रिणी,  
आता ते पान खूप जुनं झालयं,
कोरडं पडलयं.
त्या पानाच्या जाळीवर विरुन गेलेत माझे सर्व शब्द
बर्फाखालून वाहणार्‍या हिमनदीसारखे शांत, स्तब्ध
आज पुन्हा, माहित नाही कितव्यांदा
मी आवरतोय त्या पानाला स्पर्शण्याचा माझा मोह
कारण, त्या पानावर कुठे तरी साचून राहिलाय
तुझ्या डोळ्यांतील आसवांचा डोह.....

मैत्रिणी...


- दीपक परुळेकर